#أمراض_شائعة
#التهاب_الكبد
#بحث ٦
👩: ييي سمعت أنو ابنك معو التهاب كبد ، شو صاير معو؟
🙍🏻‍♀️: الله وكيلك تعبّني، صاير بيتعب وبيتنرفز عأقل شغلة وبترتفع درجة حرارتو وجسمو هلكان وقالب لونو عأصفر 💔
كتير منسمع بأشخاص انصابو بالتهاب الكبد او توفوا من وراه. بس يا ترى شو هو التهاب الكبد وليش مننصاب فيه وكيف منعرفه ومنتفاداه كل هاد رح نحكيه اليوم
♥️ أول شي 👨‍⚕️ التهاب الكبد من الاسم بيصيب الكبد وممكن ينشفى ذاتياً من دون علاج أو ممكن يتطور هاد الالتهاب ليتحول
💢لتليف بالكبد(بتتحول أنسجة الكبد الطبيعية الوظيفية لأنسجة بتخلي الكبد يفقد القدرة عالقيام بوظائفه بشكل تدريجي)
💢أوممكن يسوء الوضع اكتر اذا ما عالجناه ويوصل لتشمّع (وهو مرحلة متقدمة من التليف بتصير فيها خلايا الكبد غير قادرة على انها تتجدد وتنشفى)
💢 أو لسرطان بالكبد.

👦: طيب دكتور شو اسباب المرض وشو الشغلات الي بتسببلنا ياه ؟
👨‍⚕️:في اكتر من سبب :
❌ فيروسات الكبد(A.B.C.D.E) وهي أكتر الأسباب الشائعة.
❌ أكل طعام ملوث أو منتهي الصلاحية.
❌ شرب الكحول(لأن الكحوليات بتدمر خلايا الكبد).
❌المواد السامة متل تناول بعض الأدوية (الباراسيتامول) بلا ارشاد.
❌ مرض مناعي ذاتي ( بهي الحالة بيهاجم جهازنا المناعي خلايا الكبد بطريق الخطأ و النساء عرضة للاصابة بهاد النوع اكتر بثلاث مرات )

👦دكتور كيف فيني اعرف انو معي التهاب الكبد؟
👨‍⚕️من خلال الاعراض يلي منشوفها ع حالنا :
🚫 منتعب كتير وبصير ما عنا قدرة عالتركيز(الشعور بالنعس بشكل دائم والمزاج سيء 💔)
🚫 ارتفاع درجة الحرارة
🚫 ألم بالمفاصل والعضلات
🚫بيصير لون الجلد والعيون أصفر (اليرقان)
🚫البول بيصير لونو غامق (و اذا اتطور المرض وتركناه بلا علاج بيصير لون البول قريب عالاحمر ).
🚫الشعور بالغثيان والاقياء

🌟انتباه 🗣️🗣️🗣️ في نسبة كبيرة من مرضى التهاب الكبد ما بتظهر عندن الأعراض وبيكتشفو المرض بالصدفة عن طريق فحوصات دم. وعند مرضى تانيين ممكن يكون أول عرض لظهوره هو فشل الكبد 💔.
هلا منجي للسؤال الأهم الي لازم نعرف جوابو ونطبقو ❤️💪
👩: دكتور كيف فيني احمي حالي من الاصابة بالتهاب الكبد؟!
👨‍⚕️:✔️بشكل أساسي اللقاحات هي الجزء الأهم للحماية ولكن في لقاحات لفيروسات التهاب الكبد A.B أما باقي الفيروسات لسا ما نوجدلها لقاح..
✔️النظافة الها دور كتير كبير بمنع انتقال هي الفيروسات لأجسامنا فلازم غسل اليدين قبل وبعد الطعام وبعد ما نطلع من الحمام والاهتمام بنظافة أدوات الأكل وأدواتنا الخاصة ونتأكد أنو ما حدا مستخدمهن قبلنا💎 وكتير مهم نحافظ على النظافة الشخصية💫
✔️و هاد المرض بينتقل عن طريق الدم وسوائل الجسم فلازم نتأكد من شفرات الحلاقة، مناشف الحمام وفراشي الأسنان يكونو ألنا بشكل خاص ونبدلن عطول♥️
✔️واذا في مريض نبتعد عن أغراضه الشخصية ونحاول ما نحتك بالشغلات يلي بيستخدمها ونبعد عن افرازاته. وهيك بشوية خطوات فينا نتفادى كتير مشاكل و ما نعطي فرص لننصاب بالتهاب الكبد ❤️💪 ودمتم بصحة وعافية🌸
بحث: عمرو محيش
تدقيق علمي: الصيدلانية. رنيم الطيار
تصميم: محمد عمر قزيز
#Syria_Med ♥️